Kongresuz beteriko azaroa Donostian: hiri-berrikuntza, bitartekaritza, osasuna eta ikerketa

Azaroa erreferentziazko hitzordu zientifiko eta profesional berriekin iritsiko da Donostiara. Hilabetean zehar, Kursaal, Tabakalera, Carlos Santamaria Zentroa eta Tecnalia izango dira gaur egungo erronka nagusietako batzuk aztertuko dituzten estatuko eta nazioarteko topaketen egoitza: hirien etorkizuna, gatazken eraldaketa, osasun-arreta espezializatua eta ezagutza zientifikoaren kudeaketa.

Programazio horrek agerian uzten du erakundeen, ikerketa-zentroen eta tokiko eragileen arteko lankidetza estua, lurraldera balio erantsi handiko kongresuak erakartzeko.

Azaroaren 4tik 6ra, Donostiak City Science Summit 2026 nazioarteko topaketa hartuko du. Mubil izango da tokiko sustatzailea, eta zientzia urbanoan, plangintzan, teknologian eta politika publikoetan adituak diren profesionalak bilduko ditu.

Kursaal eta Tabakalera izango dira City Science Network nazioarteko sarearen hitzordu honen egoitzak. Sare horrek ezagutza zientifikoa eta teknologia berriak aplikatzea sustatzen du, hiri bizigarriagoak, inklusiboagoak eta erresilienteagoak eraikitzeko.

Programa honek aurkezpenak, proiektuen erakustaldiak eta tailer parte-hartzaileak uztartuko ditu, hiri-inguruneen eraldaketan lanean ari diren ikertzaileen, erakundeen eta profesionalen arteko esperientzia-trukea sustatzeko.

Topaketa hau Gipuzkoan egiteak lurraldeak berrikuntzaren eta mugikortasun jasangarriaren arloetan duen erreferentziazko posizioa indartzen du, Mubil-en jarduerarekin lotura estua duten bi esparrutan.

City Science Summit 2026ri buruzko informazio gehiago.

Azaroaren 16tik 19ra, Carlos Santamaria Zentroak XIII World Mediation Forum nazioarteko topaketa hartuko du. Euskal Herriko Unibertsitateko (EHU) Kriminologiaren Euskal Institutua izango da tokiko sustatzailea.

«Bitartekaritzaren kulturak eta bitartekaritza kultura eraldatzaile gisa» lelopean, kongresuak hainbat herrialdetako adituak bilduko ditu, bitartekaritzak elkarrizketan eta bakean oinarritutako gizarteak eraikitzeko duen eginkizunaz hausnartzeko.

Lau jardunalditan zehar, hitzaldiek, eztabaida-mahaiek eta tailerrek bitartekaritzak justizian, hezkuntzan, osasunean, erakundeetan eta komunitateetan duen aplikazioa aztertuko dute, justizia errestauratiboari eta gatazkei aurre egiteko modu berriei arreta berezia eskainiz.

Topaketak, halaber, Donostiako ikerketak eta unibertsitate-esparruak bizikidetza, elkarrizketa eta gizarte-eraldaketarako ereduak garatzeko egiten duten ekarpena nabarmenduko du.

XIII World Mediation Forum topaketari buruzko informazio gehiago.

Bitartekaritzaren Munduko Foroarekin ia batera, azaroaren 18tik 20ra, Kursaal Jauregiak Erizaintza Neurologikoaren Espainiako Elkartearen (SEDENE) XXXIII. Urteko Kongresua hartuko du, Erizaintza Neurologikoaren IX. Nazioarteko Kongresuarekin batera. Donostia Unibertsitate Ospitalea izango da tokiko sustatzailea.

«Neurozainketa 360°: Arreta integral eta integraturantz» lelopean, topaketak erizaintzako profesionalak, espezialistak eta ikertzaileak bilduko ditu, aurrerapen zientifikoak, asistentzia-esperientziak eta gaixotasun neurologikoak dituzten pertsonen zainketarako ikuspegi berriak partekatzeko.

Kongresuak arretaren ikuspegi globala sustatuko du, dimentsio klinikoak, emozionalak, sozialak, teknologikoak eta antolakuntzakoak uztartuz, eta pertsonak zainketen erdigunean jarriz.

Hitzordu honek erizaintza espezializatuaren eginkizuna ikusarazten lagunduko du, baita ikerketak, berrikuntzak eta diziplina anitzeko lanak asistentziaren kalitatea hobetzeko duten garrantzia nabarmentzen ere.

SEDENE 2026 Kongresuari buruzko informazio gehiago.

Azaroko kongresu-agenda hilaren 24tik 26ra egingo den Autumn 2026 euroCRIS Strategic Membership Meeting (SMM2026) topaketarekin amaituko da. Hitzordua Tecnaliaren instalazioetan izango da, Gipuzkoako Zientzia eta Teknologia Parkean.

EuroCRISek antolatuta, Tecnaliarekin eta Zientzia eta Teknologiarako Espainiako Fundazioarekin (FECYT) lankidetzan, topaketak ikerketari buruzko informazio-sistemen arloko nazioarteko profesionalak eta adituak batuko ditu.

Hiru jardunalditan zehar, besteak beste, zientzia irekia, sistemen elkarreragingarritasuna, datu zientifikoen kudeaketa, azpiegitura digitalak eta adimen artifizialaren aplikazioa ikerketari buruzko informazioan aztertuko dira.

Hitzordu hauek esperientziak partekatzeko, ekimenak aurkezteko eta erakunde zientifiko eta teknologikoen arteko lankidetza berriak sortzeko aukera eskainiko dute, Tecnaliaren eta euskal ikerketa-ekosistemaren rola Europako ezagutza-sareetan indartuz.

EuroCRIS SMM2026 topaketari buruzko informazio gehiago.

Hiri-zientziatik nazioarteko bitartekaritzara, eta erizaintza neurologikotik ikerketaren kudeaketara. Azaroko agendak berriro erakusten du Donostiak hainbat diziplinatako topagune izateko duen gaitasuna, ezagutza partekatzeko, ideia berriak sustatzeko eta profesionalen arteko harremanak sortzeko.

Mubil, Kriminologiaren Euskal Institutua, Donostia Unibertsitate Ospitalea eta Tecnalia bezalako tokiko eragileen inplikazioa funtsezkoa da topaketa espezializatuak erakartzeko eta lurraldearen nazioarteko proiekzioa indartzeko.

Kongresuetarako egoitza-sare moldakorrarekin eta zientzia-, osasun-, teknologia- eta unibertsitate-sare sendoarekin, Donostiak eta Gipuzkoak ezagutza eta lankidetza protagonista dituzten kongresu eta bilera profesionaletarako erreferentziazko helmuga gisa duten posizioa sendotzen jarraitzen dute.