Donostia / San Sebastián indarrez proiektatzen da zientzia eta berrikuntzaren munduko mapan: nazioartean garrantzitsuenak diren 200 hiri zientifikoen artean dago, eta Espainian laugarren postuan kokatzen da Nature aldizkariaren arabera. Hirian, 1.000 biztanleko 22 ikertzaile daude —Estatuko batezbesteko 4,6 baino askoz gehiago—.
 
Urtero BPGaren %3,7 inbertitzen da I+G+b arloan —Europako batezbesteko %2,27 baino handiagoa—, hau da, 365,4 milioi euro urtean. Gainera, berrikuntzan aktibo dauden 124 enpresek eta 6.800 profesional espezializatuk —%46,6 emakumeak— osatzen dute tokiko ehuna. Hiriko enpleguaren %35 ezagutza intentsiboko sektoreetan kontzentratzen da, balio erantsi handiko jardueretarako orientazio sendoa erakutsiz.

Bestalde, Donostiak lehen mailako zentro zientifiko, teknologiko eta medikoak ditu, talentu- eta berrikuntza-ekosistema batean integratuak, nazioarteko posizionamendu sendoa ematen diotenak.

Bikaintasun-ingurune hori are gehiago indartzen du Nobel saridun bi zientzialariren presentziak: Albert Fert eta George Smoot. Nazioarteko erreferente horien lana prestigioa ematen dio tokiko ingurune zientifikoari —biologia-zientzietan, nanozientzian, material aurreratuetan, mugikortasun adimendunean, adimen artifizialean eta teknologia kuantikoetan nabarmena—, eta Donostia maila handiko topaketa zientifikoetarako helmuga sendo gisa sendotzen da.

Posizionamendu hori are gehiago indartu duen azken gertaera esanguratsuetako bat IBM Quantum System Two inauguratu izana da; Europan mota horretako lehen superordenagailu kuantikoa eta munduko hirugarrena, adimen artifizialean, material berritzaileetan eta bioteknologian aplikazioak dituena.